أنا ليبية جدودي من مصراتة ... بنغازي هي مولدي ومسكن ابي ومسكني.. خوالي عروق امي وخوال باتي من درنة ... وجزء كبير من اهلي يسكنوا في طرابلس وبعضهم في المرج وفي قماطة وفي بني وليد.. لي اخوة واخوات في الحركة الكشفية في كل مدن ليبيا ... ولي اصحاب درسنا معا الصحافة من معظم انحاء الوطن .. لى معارف من طبرق والمرج والبيضاء ويفرن وسبها وسرت وبرسس وتوكرة والزويتينة.. اتواصل مع احباب في اجدابيا ومسلاتة وراس لانوف وزلة وغدامس والجغبوب.. سافرت لودان وهون وسوكنة وزوارة والزاوية والابرق وطبرق واوباري وغات.. وتعرفت الان على احباب من ورشفانة بلاد الكرم والجود... وخيمت في جدايم والقوارشة وبو مسافر والبلنج والهيشة وقبرعون.. زردت في توكرة وبرسس والبكور وسوسة وشحات.. غسلت شعري تحت شلال درنة وشلال وادي الكوف وفي عيون سيلين وعين الشرشارة والدبوسية ... وسبحت في شط الحنية والحمامة والهمسة وقاريونس والحليس والغنيمة .. وصليت في الصحابة بدرنة وسي رافع بالبيضاء وسي عبد السلام الاسمر في زليتن.. وشريت من سوق مصراتة والخمس وتاورغاء اجمل الاشياء .. وتذوقت زيت مسلاتة وتمر الجفرة وزميتة قماطة وبسيسة غريان.. وحليت من الوردية بعسل الحنون .. وشريت من العويلية عنب وتفاح وخوخ وانجاص .. واستمتعت بذوقة رطب من اجخرة وتلذذت بمنجا الكفرة الاصل.. وكليت شماري وادي الكوف وترفاس السدرة وتمر هون.. تفاخرت بلبدة وسوسة وشحات وصبراتة وتسيلي... ولبست زينة غدامس وسمنو ودرج والعوينات.. وراسلت في صغري صاحبات من زليطن والمرج والزنتان ومرزق وتساوة والقطرون.. اسعدني درست طلابي احبابي من بوجرار والخمس واجدابيا والمرج وسرت ودرنة وسبها وطبرق وودان... ونتمنى نتعرف على خوت من راس لافوف وقمينس والقيقب وبني وليد.. ونراسل اصحاب من زلة والمقرون وتاجوراء والحساونة وبن غشير وكل مدينة ما ذكرتها.. ذكروني كان نسيت.. انا ليبية امي هي ليبيا وابي هو الوطن... انا ليبية وكل اهلي ليبيين... كل اصحابي ليبيين.. كل خوتي ليبيين وسيل درنة زاد غلانا وقرب بعضنا لبعض.. نحن اهل ونحن خوت.. وربي يرحم من سبقنا ويبشرنا بسلامة باقي الخوت